Latest News Live: ഇന്നത്തെ പ്രധാന വാര്‍ത്തകള്‍ June 5
6:18 PM നിലമ്പൂരിലെ ചിത്രം തെളിഞ്ഞു: അന്‍വറിന് ചിഹ്നം കത്രിക, മത്സരരംഗത്ത് പത്തുപേര്‍
4:21 PM സമഗ്ര അവയവമാറ്റ കേന്ദ്രം: അവയവം മാറ്റിവയ്ക്കല്‍ രംഗത്ത് നിര്‍ണായക ചുവടുവയ്പ്പ്
10:21 AM കേന്ദ്രസര്‍ക്കാര്‍ കേരളത്തോട് കാണിക്കുന്നത് കടുത്ത വിവേചനം; ദുരിതാശ്വാസ ധനസഹായത്തില്‍ പോലും ഇരട്ടനീതി: കൊടിക്കുന്നില്‍ സുരേഷ് എംപി
പ്രളയദുരിതാശ്വാസത്തിനായി യുഎഇ സര്‍ക്കാര്‍ വാഗ്ദാനം ചെയ്ത ധനസഹായം സ്വീകരിക്കാന്‍ കേന്ദ്ര സര്‍ക്കാര്‍ കേരളത്തെ വിലക്കിയ നടപടി സംസ്ഥാനത്തോടുള്ള അന്ധമായ രാഷ്ട്രീയ വൈരം മൂലമാണെന്ന് കോണ്‍ഗ്രസ് പ്രവര്‍ത്തകസമിതി അംഗവും കൊടിക്കുന്നില്‍ സുരേഷ് എംപി കുറ്റപ്പെടുത്തി.
‘കേരളം നേരിട്ട മഹാപ്രളയത്തിനിടയില്‍ യുഎഇ സര്‍ക്കാര്‍ മാനവികതയുടെ ഭാഗമായി സഹായഹസ്തം നീട്ടിയപ്പോള്‍, അതിനെ സ്വാഗതം ചെയ്യുന്നതിന് പകരം കേന്ദ്ര സര്‍ക്കാര്‍ അത് അംഗീകരിക്കാതെ തടസ്സപ്പെടുത്തിയതിന്റെ പിന്നില്‍ വ്യക്തമായ രാഷ്ട്രീയ മുതലെടുക്കല്‍ മാത്രമാണ്.
അതേസമയം ഇപ്പോഴത്തെ സമാനദുരന്തം നേരിടുന്ന മഹാരാഷ്ട്രയ്ക്ക് വിദേശ ധനസഹായം സ്വീകരിക്കാന്‍ അനുമതി നല്‍കിയിരിക്കുകയാണ്. ഈ ഇരട്ടനീതിയിലൂടെയാണ് കേന്ദ്രം സത്യത്തില്‍ ആര്‍ക്കൊപ്പമാണെന്ന് വ്യക്തമാക്കുന്നത്,’ കൊടിക്കുന്നില്‍ അഭിപ്രായപ്പെട്ടു.
കേരളത്തിലെ ദുരന്തനിവാരണ ശ്രമങ്ങള്‍ പലതവണ കേന്ദ്രസഹായം ഇല്ലാതെ തന്നെ മുന്നോട്ട് കൊണ്ടുപോകേണ്ടിവന്നിട്ടുള്ളതിന്റെ പിന്നിലള്ള കാരണം ഈ വിവേചനമാണ്, അദ്ദേഹം പറഞ്ഞു.
‘കേരള ജനതയുടെ ജീവനും സ്വത്തിനും വേണ്ടി യുഎഇ പോലെയുള്ള രാഷ്ട്രങ്ങള്‍ സഹായഹസ്തം നീട്ടുമ്പോള്‍ അതിനെ തടസ്സപ്പെടുത്തുന്ന കേന്ദ്ര നയങ്ങള്‍ ജനവിരുദ്ധവും അസംവേദനാശൂന്യവുമാണ്.
മഹാരാഷ്ട്രയ്ക്കായി അതെ നടപടി കൈക്കൊള്ളാതിരിക്കാന്‍ കാരണം എന്താണ് എന്ന് പ്രധാനമന്ത്രിയും ആഭ്യന്തര മന്ത്രിയും രാജ്യത്തിന്റെ ജനങ്ങള്‍ക്ക് വിശദീകരിക്കണം,’ എംപി ആവശ്യപ്പെട്ടു.
കേരളത്തെ സംബന്ധിച്ചിടത്തോളം എല്ലാ ദേശീയ നയങ്ങളിലും വ്യത്യസ്തമായ സമീപനമാണ് എന്‍ഡിഎ സര്‍ക്കാര്‍ സ്വീകരിക്കുന്നതെന്നും, ഇതൊരു ഫെഡറല്‍ ഘടനയ്‌ക്കെതിരായ കടന്നുകയറ്റമാണെന്നും കൊടിക്കുന്നില്‍ സുരേഷ് എംപി വ്യക്തമാക്കി.
10:00 AM നിലമ്പൂരിൽ ഇന്ന് അന്തിമ സ്ഥാനാർത്ഥി ചിത്രം തെളിയും.
നാമനിർദ്ദേശപത്രിക പിൻവലിക്കാനുള്ള സമയ പരിധി വൈകീട്ട് 3 ന് അവസാനിക്കും. സൂക്ഷ്മ പരിശോധനയ്ക്ക് ശേഷം പ്രധാന മുന്നണി സ്ഥാനാർത്ഥികൾ ഉൾപ്പെടെ 14 സ്ഥാനാർത്ഥികളാണ് അവശേഷിക്കുന്നത്. ഇതിൽ അവസാന നിമിഷം പി വി അൻവർ പത്രിക പിൻവലിക്കുമോ എന്നാണ് ആകാംക്ഷ.
പത്രിക സമർപ്പിച്ച് രണ്ട് ദിവസമായിട്ടും അൻവർ പ്രചരണരംഗത്തേക്ക് ഇറങ്ങാത്തതാണ് സംശയത്തിന് വഴിയൊരുക്കുന്നത്. യുഡിഎഫ് സ്ഥാനാർത്ഥി ആര്യാടൻ ഷൗക്കത്ത് ഇന്ന് എടക്കര, കരുളായി പഞ്ചായത്തുകളിൽ പര്യടനം നടത്തും. മൂത്തേടം പഞ്ചായത്തിലാണ് എം സ്വരാജിന്റെ പര്യടനം. അതേസമയം നിലമ്പൂരിൽ ഇന്ന് ബിജെപി മണ്ഡലം കൺവെൻഷൻ നടക്കും. കേന്ദ്ര സഹമന്ത്രി സുരേഷ് ഗോപി ഉദ്ഘാടനം ചെയ്യും.